CEBU CITY– Pagpalapad ug pagbalik sa natural nga imahe sa mga kasapaan ang makasulbad sa problema sa pagbaha sa dakbayan sa Sugbo.
Gihimug-atan ni Cebu City Councilor Joel Garganera, nga kadaghanan sa mga sapa sa dakbayan ang giingong patay na diin wala na’y mabuhi nga tanom o isda.
Matud pa nga adunay budget ang Department of Public Works and Highways (DPWH) alang sa flood control apan giingong wala kini magamit ug tarung sa nakalabay nga administrasyon diin mas gitutokan ang mga sapa nga walay problema.
Gidugang pa ni Konsehal Garganera nga adunay mga dagko nga establisimento nga anaa na kilid sa kasapaan nga kinahanglan usab nga hatagan ug aksyon sa lokal nga kagamhanan. Subay niini, gitataw ni Garganera nga hilabihan ka importante ang political will sa gobyerno inubanan sa kooperasyon sa katawhan.
Nanghinaut ang konsehal nga ang dugay nang problema sa baha sa dakbayan ang mahatagan na ug solusyon sa kasamtangan nga administrasyon. | By Bombo Suzette B. Rafols
