Nagpadayon ang gilusad nga vendors registration sa Kagamhanang Dakbayan sa Sugbo nga mamaligya sa kapistahan sa Sinulog 2026.
Kini subay sa mando nga giluwat ni Cebu City Mayor Nestor Archival Sr. niadtong nakalabayng Lunes, Enero 5 aron madumala pagtarong ang mga manindahay sa dakbayan inig Enero 18 (adlaw sa Fiesta Señor).
Gisugdan kagahapong adlawa sa Martes, Enero 6 ang rehistrasyon sa mga manindahay sa dalan P. Zamora (atbang sa entrada sa Basilica) didto sa DWUP Office. Karong adlawa sa Miyerkules, Enero 10, ang mga manindahay nga nag-apilyedo sa letrang A-J kay gikinahanglan magparehistro sa Cebu City Sports Institute sa Barangay Sawang Calero sugod alas 8 sa buntag hangtod alas 5 sa hapon. Samtang ugma sa Huwebes, Enero 11 kay ang mga manindahay nga nag-apilyedo sa letrang K-Z sa susamang venue ug oras.
Giawhag niini ang mga magparehistro nga magdala og balidong ID aron mahan-ay ang proseso sa rehistrasyon.
Gipahinumdoman sa kagamhanang dakbayan ang mga manindahay nga sa gitaganang lugar lang sila gitugotan mamaligya sulod sa syudad sa tinguha nga mapabilin ang respeto sa ka banal sa okasyon og mapanalipdan ang kahapsay, kaluwasan, ug tinuod nga kahulugan sa kapistahan.
