Nagkasumpaki sila si Kamanggagawa Party-list Representative Elijah “Eli” San Fernando ug Department of Labor and Employment (DOLE) Secretary Francis Tolentino atol sa deliberasyon sa gihangyong 2027 budget sa ahensya.
Nagsugod ang tensyon tungod sa naatras nga pagpatuman sa dugang-suholan alang sa mga minimum wage earner sa National Capital Region (NCR), diin gipahayag ni San Fernando nga basi sa order sa Pasig Regional Trial Court (RTC) Branch 152, ang writ of preliminary injunction mahimong epektibo lamang kung ang mga petitioner magdeposito og ₱10-bilyon nga bond.
Tungod kay wala pa gi-isyu sa mga kompanya ang bond, gipasabot sa magbabalaod nga walay legal injunction nga epektibo, busa ang DOLE walay igong legal nga rason aron babagan ang pagsaka sa sweldo.
Dugang gipunting ni San Fernando nga subay sa Republic Act No. 6727 o ang Wage Rationalization Act, ang Regional Tripartite Wages and Productivity Boards (RTWPB) ang adunay eksklusibong gahum sa pagtakda sa sweldo, ug ang balaod klaro nga nagdili sa pag-isyu og mga injunction sa ordinaryong mga korte batok sa desisyon sa wage board.
Isip depensa, gipatin-aw ni Sec. Tolentino nga ang pagsuspenso sa taas-suholan dili kaugalingong desisyon sa DOLE kundi pagtamod ra sa nagpadayon nga proseso sa balaod.
Sumala niya, ang Korte Suprema lamang ang adunay gahum sa pagdesisyon sa legalidad niini, ug sa higayon nga ang korte suprema mopagawas og mando nga ipatuman ang pagtaas, ang ahensya dali nga motuman. Dugang pa sa kalihim nga ang DOLE nakasabot sa kalisud ug panginahanglan sa mga Pilipinong trabahante taliwala sa padayon nga pagsaka sa presyo sa mga palaliton.
Gibutyag usab niya nga ang ahensya nagsumite na, pinaagi sa Office of the Solicitor General (OSG), usa ka legal nga petisyon aron kuwestiyonon ang mando sa RTC, ug gisuportahan usab nila ang usa ka lahi nga petisyon sa mga grupo sa mamumuo lakip ang Kamanggagawa Party-list ngadto sa Korte Suprema aron mapugngan ang RTC sa pag-invalidate sa wage order.
Sa pagpadayon sa mainit nga diskusyon, giinsistir ni San Fernando nga ang DOLE walay katungod sa pagpangayo og pondo alang sa tuig 2027 kung dili niini mapanalipdan ang mga katungod sa mga trabahante, busa iyang gihangyo nga ang badyet sa ahensya i-defer o i-set aside sa pagkakaron. Apan ang petisyon wala maaprobahan human kini nakadawat lamang og 7 ka boto nga pabor batok sa 31 nga mibotar batok niini.
