CEBU CITY-Gitumong karon ang bag-ong resolusyon gikan sa Konseho sa Dakbayan sa Sugbo aron maseguro nga dili mapahimuslan ang mga kahinguhaan sa kagamhanan, hilabina ang mga sakyanan sa barangay, alang sa mga kampanya sa politika.
Giawhag usab ang mga opisyal sa publiko na kadtong nagtinguha nga magpapili pag-usab sa umaabot nga eleksyon, nga sundon ang mga sumbanan sa pamatasan samtang nagkaduol ang panahon sa eleksyon.
Gisuwat ang resolusyon ni Cebu City Councilor Rey Gealon diin nagpasiugda sa panginahanglan sa pagpanalipod sa integridad sa serbisyo publiko pinaagi sa pagdili sa paggamit sa mga barangay bus ug ubang sakyanan sa gobyerno alang sa politikanhong katuyoan.
Kini nga lakang kay nagtinguha sa pagpugong sa sayop nga paggamit sa publiko nga mga kahinguhaan alang sa personal o politikanhong kaayohan samtang nagpasiugda sa ilang husto nga katuyoan sa pagserbisyo sa komunidad.
Ug kon gani mapamatud-an ang kandidato o opisyal sa paggamit sa mga sakyanan sa barangay o uban pang mga kabtangan sa gobyerno alang sa pagpangampanya kay mahimong mag-atubang sa mga silot nga administratibo ug kriminal, lakip ang pagkadiskuwalipikar sa pagkupot sa katungdanan sa publiko.
