CEBU CITY — Blangko pa ang kapulisan sa motibo kabahin sa pagpamanhig-patay sa usa ka retiradong police officer kaganihang buntag sa may Purok 3, Brgy. Valencia, sa isla sa Panglao, Bohol.
“Dead on the spot” ang biktima nga si PO3 Ramon Bolongaita diin niretiro kini niadtong tuig 2016 human kini na-assign sa dakbayan sa Sugbo.
Gisaysay sa imbestigador nga si Police Corporal Chito Jerome Galua sa Panglao Police Station, nga nagbisikleta si Bolongaita sa gawas sa ilang panimalay nianang panahona.
Matud niini nga kalit lang nga milabay ang wala pa matinong gidaghanon sa mga wala mailhing gunmen ngadto sa retiradong pulis dayon og pusil.
Milingi na lang ang mga tawo sa gawas human nakadungog og pagbuto sa armas ug nabantayan nga nahagba na lang ang biktima.
Nakaangkon og samad-pinusilan sa ulo si Bolongaita nga mao ang hinungdan sa hinanaling kamatayon.
Narekober sa crime scene ang tulo ka kabhang sa bala gikan sa 9mm nga armas.
Nakig-alayon karon ang PNP ngadto sa kabanay ni Bolongaita alang sa pag-background check niini. /GN
