Nakakuha og lapad nga atensyon ug positibong reaksyon sa social media ang pasundayag ni RJ Perkins, usa sa mga kandidato sa Mister Pampanga 2026, human niyang madani ang publiko pinaagi sa iyang self-confidence sa swimwear segment sa kompetisyon.
Sa eksklusibong pakighinabi sa Bombo Radyo Cebu, giingon ni Perkins nga ang iyang pagsalmot sa pageant dili lang para sa korona, kundili usa ka paagi aron ipakita nga ang tinuod nga kumpiyansa nagagikan sa pagdawat sa kaugalingon ug sa pagbarug kung kinsa gyud ang usa ka tawo.
Matud niya, bisan pa sa mga pagsaway ug opinyon sa uban, importante nga magpabiling lig-on ug dili magpadaog sa pressure sa katilingban, ilabi na sa mga isyu sa body image.
Iyang gipasiugda nga ang modernong pagsabot sa “ideal man” dili na lamang nakabase sa pisikal nga panagway, kundili sa kinaiya, values, ug sa abilidad sa usa ka tawo sa pagdala sa iyang adbokasiya.
Nagbilin usab siya og makapadasig nga mensahe sa kabatan-onan nga nakasinati og insecurities, nga ang pinakaimportante mao ang paghigugma ug pagdawat sa kaugalingon, ug ang pagpadayon sa mga damgo bisan pa sa mga pagpanghusga sa uban.
Samtang nagpadayon ang iyang journey sa kompetisyon, giimbitahan ni Perkins ang publiko nga motan-aw ug mosuporta sa Mister Pampanga 2026 pre-pageant sa Mayo 3 sa SM Pampanga ug ang grand finals sa Mayo 9 sa LausGroup Event Centre.
Ang iyang viral nga moment giila sa daghang netizens isip usa ka simbolo sa body positivity, inclusivity, ug pagbag-o sa panan-aw sa modernong pageantry.
