Giklaro sa pangu sa PISTON Cebu Chapter nga si Greg Perez, nga dili igo nga maka-alibyo sa sektor sa transportasyon ang bag-o lang nga rollback sa presyo sa mga produktong petrolyo.
Diin gidugang niya nga dili gayud kini igo gumikan kay ang pagsaka niini kaniadto sa mga milabayng semana niabot man sa kapin 20 pesos nga usbaw ilabi na sa presyo sa diesel.
Mao kini ang gikabutyag ni Perez atol sa eksklusibong pakighinabi sa Bombo Radyo Cebu newsteam kaniya, diin iyaha gayud nga gitino og pag-ayo nga bisan paman adunay rollback, dako gihapon kaayo kini og pagkuwang.
Kahinomdoman nga nibati og gamay nga kahupayan ang mga motorista ug mga konsumidor karong semanaha subay sa pag os-os sa presyo sa gasolina human sa mga semana nga sunod-sunod nga pagsaka.
Diin, padayon nga gimonitor sa gobyerno sa Dakbayan sa Mandaue ang paglihok sa presyo sa gasolina aron masiguro nga ang mga gasolinahan nagsunod sa hustong rollback ug aron mapanalipdan ang interes sa publiko.
