Gikanayon ni Russian President Vladimir Putin nga andam ang Kremlin nga ipadayon pag-usab ang tulo-ka-habig o trilateral nga negosasyon alang sa kalinaw tali sa Russia, US, ug Ukraine human sa tunga-tunga sa Nobyembre.
Kini gihimo subay sa hangyo sa espesyal nga sinugo sa US nga si Steve Witkoff, kinsa nakigkita kang Putin sulod sa mga tulo ka oras niadtong Miyerkules.
Ang maong panagtagbo sa St. Petersburg nahitabo human sa usa ka “produktibo” nga pakigtagbo ni Witkoff uban ni Ukrainian President Volodymyr Zelensky sa Norway, samtang naningkamot ang Estados Unidos nga iduso ang mga sugyot aron tapuson ang gubat.
Sumala sa usa ka briefing human sa panagtagbo gikan sa iyang aide nga si Yury Ushakov, nagpahayag si Putin nga andam siyang ipadayon ang tulo-ka-habig nga negosasyon human sa Nobyembre 10. Matod sa aide, buot sa Kremlin nga hisgotan ang pagtukod og usa ka “security framework” alang sa Russia ug Ukraine human sa panagbangi, apan wala naghatag og dugang detalye kon unsa ang pangayoon sa Russia isip kabahin niini nga balangkas.
Bisan pa sa positibo nga mga komento mahitungod sa posibleng negosasyon sa umaabot, wala pay timailhan hangtod karon nga nag-usab ang Russia sa bisan asa sa ilang estrikto ug dagkong mga baruganan.
Ang mga nangaging gipangayo sa Russia nagpasabot og halos hingpit nga kadaugan—lakip na ang pag-angkon sa tibuok rehiyon sa Donbas sa sidlakang Ukraine, nga kasamtangang anaa na sa ilawom sa okupasyon sa Russia. Nanawagan usab ang Moscow nga pakunhuran pag-ayo sa Ukraine ang gidak-on sa ilang militar ug mopasalig nga dili gayud moapil sa NATO.
Atol sa bag-o nga mga pakig-istorya, nagpakita og interes si Putin sa pagpabalik sa kooperasyon sa ekonomiya uban sa Estados Unidos, ingon man sa posibilidad sa usa ka panagtagbo uban sa China aron hisgotan ang mahitungod sa Ukraine. Kini nagsunod sa bag-o nga mga lakang sa administrasyon ni Trump nga tangtangon ang mga silot (sanctions) batok sa Russia ug pagkab-ot og kasabutan mahitungod sa pag-eksport sa diesel.
Usa sa mahinungdanong resulta sa maong panagtagbo mao ang pahibalo ni Witkoff nga gibuhian sa Russia ang 74-anyos nga Amerikanong binilanggo nga si Stephen Hubbard, kinsa natanggong sa nasud sulod sa kapin sa upat ka tuig.
Si Putin, Witkoff, ug ang mga tighubad naglingkod palibot sa usa ka dako ug lingin nga lamesa samtang gihisgotan nila ang nagkalain-laing mga isyu. Lakip niini ang kaandam sa Russia nga motabang sa pagsulbad sa gubat sa Iran, ang posibilidad sa pag-eksport sa Russia og abono ngadto sa US, ug ang pagbuhi kang Hubbard. Ang panagtagbo nagpadayon luyo sa sirado nga mga pultahan. Si Jared Kushner, ang umagad ni Trump nga nalambigit usab sa negosasyon alang sa kalinaw, miapil pinaagi sa online tungod kay siya adunay trangkaso.
