Human sa lima ka oras nga negosasyon tali sa mga negotiator sa Amerika ug Russia,, ang duha ka habig napakyas sa paghimo og dakong kalamboan sa plano sa kalinaw sa Ukraine.
Sumala sa tigpamaba sa Kremlin nga si Dmitry Peskov, ang miting produktibo, apan ang ubang bahin sa plano wala pa gihapon gidawat sa Russia.
Ang senior aide ni Presidente Vladimir Putin sa Russia nga si Yuri Ushakov, kinsa mitambong sa miting sa Moscow, miingon nga wala pa silay naabot nga kasabutan, busa miingon siya nga daghan pa nga trabaho ang kinahanglan buhaton.
Ang pipila sa mga dili pagsinabtanay tali sa Moscow ug Kyiv mao ang pagsupak sa Ukraine sa paghatag sa teritoryo niini nga padayon nilang gikontrol ug ang mga garantiya sa seguridad nga ihatag sa Europe.
Lakip sa mga mitambong sa miting mao ang US Special envoy sa Middle East nga si Steve Wikoff ug ang umagad ni Presidente Donald Trump sa US nga si Jared Kushner, kinsa wala na mohatag og komento sukad mibiya sa Moscow human sa negosasyon.
