Gidakop na sa mga otoridad ang Russian American vlogger nga si Vitaly Zdorovetskiy tungod sa gihimong pagpam-bastos niini sa pipila ka mga Pinoy sa Bonifacio Global City.
Matud sa Bureau of Immigration (BI) nga ang 33-anyos nga si Zdorovetskiy gikonsidera na karun isip ‘undesirable foreign national’.
Ang pagkasikop sa gi-reklamong langyaw gihimo human ang sunod-sunod nga reklamo gikan sa security guards lakip na usab sa empleyado sa mga mall sa siyudad sa Taguig niadtong buntag sa Marso 31.
Kauban sa BI nga misikop ang sakop sa Makati City PNP ug Criminal Investigation and Detection Group (CIDG).
Anaa na sa kustodiya ang langyaw sa Immigration facility sa Camp Bagong Diwa sa Bicutan, Taguig samtang gipaabot ang pagproseso sa iyang deportation.
Mahinumdumang sa video sa langyaw giduwa-duwaan niini ang suot nga kalo sa guwardiya sa mall ug gisuwayan pa og ilog ang armas.
Gisuwayan usab og kuha ang industrial fan gikan sa kan-anan ug gidala sa hotel diin siya nagpuyo.
Nagsugod na usab ang pagkaylap sa petition sa Change.Org para bawalan si Zdorovetsky sa tanang mga social media tungod sa cyberbullying sa Pilipinas.
