Gisuportahan sa Safe Schools Philippines (SSP) ang Senate Bill No. 2805 nga nagtinguha sa pag-amendar sa charter sa Movie and Television Review and Classification Board (MTRCB) aron mas maprotektahan ang kabataan gikan sa makadaot nga online content.
Ubos sa balaudnon, ang MTRCB adunay gahum sa pagrehistro sa mga content providers ug video-on-demand streaming platforms, apan dili kini masakop ang pre-approval sa content. Hinuon, kini nagtumong sa pagtrabaho kauban ang mga kompanya sa streaming aron ma-monitor ug i-report ang sulud nga mahimong makadaot sa mga bata.
Sumala sa giluwatang pamahayag sa SSP karong adlawa, Domingo, Hunyo 8, ilang giingon nga kini nga lakang importante aron maprotektahan ang mga bata gikan sa visual violence, malaw-ay nga content, cyberbullying, ug uban pang online content.
Nanawagan usab ang grupo sa panaghiusa sa paghatag og luwas ug makahuluganon nga media para sa mga batan-on.
‘Kinahanglan nga maghiusa kita sa paghatag luwas ug makahuluganon nga sulud sa media alang sa mga bata. Dili lang kini bahin sa kalingawan – kini bahin sa kaugmaon sa atong mga kabatan-onan,’ ang SSP miingon.
Ang SSP nagpasalamat sa Senado sa pagpauswag sa pagpanalipod sa kabatan-onan taliwala sa paspas nga kausaban sa digital media. | via Bombo Irene Ardiente
