CEBU CITY – Wala gihangop ni Dr. Rene Josef Bullecer ang inisyatiba nga gibuhat sa organisasyon nga LoveYourself kung diin nagpakatap kini ug libre nga condom sa nagkadaiyang establisimento sa Sugbo.
Sa eksklusibo nga pakighinabi sa Bombo Radyo Cebu, matud ni Dr. Bullecer nga usa kini ka matang sa ‘counter productive’ nga programa.
Sigon pa nga daghan na ug gibuhat ang gobyerno arun sa pagpahibalo sa katawhan kalabot sa HIV/AIDS apan wala pa gayud makapangita ug pamaagi arun nga kini nga malikayan.
Gibutyag ni Bullecer nga sa 20 katuig niini nga krusada ug daghan na kining mga seminar nga natambongan sa sulod ug gawas sa nasud, dili sa gihapon kini mi-uyon sa paggamit ug condom isip paglikay sa nahisgutang sakit.
Apan gikasubo niini nga sa ika-38 katuig na sa pagkatap sa HIV/AIDS, ang condom lang sa gihapon ang nahunahuna-an sa tawo nga makalikay niini.
Gihimug-atan ni Bullecer nga 96% dinhi sa Pilipinas ang na-engage sa ‘male to male sex’ ug kini ang nag-unang gigikanan sa mga nataptan ug sakit nga HIV/AIDS ug gani giingong kadaghanan niini ang naggamit ug condom apan nataptan sa gihapon sa maong sakit.
Giingong dili gayud syento porsyento nga luwas ang paggamit ug condom.
Hinuon, nagpasalamat kini nga sa matag December 1 handumon ang World AIDS Day arun nga matud pa magpahinumdom sa gobyerno nga sulod sa taas nga katuigan nagpadayon ang pagkatap sa maong sakit ug wala pa sa gihapu’y tambal alang niini.
