CEBU CITY – Importante ang kasaulogan sa ika-500 katuig sa pag-abot sa imahe sa batang Hesus, Sr. Sto. Niño hinungdan nga angayan kining pangandaman.
Sa pakighinabi sa Bombo Radyo Cebu kang Fr. Aladin Luzon, OSA, media liason, gipahibalo niini nga sulod sa taas nga panahon gi-atiman sa mga kapari-an sa Order of St. Agustine ang maong imahe hayan subsob ang ilahang gipahigayon nga pagpangandam alang sa nahisgutang kalihokan.
Gidugang ni Fr. Luzon nga karung adlawa ang ‘Prayer for the Vocation of St. Agustine’ hayan gidungan usab nila ang grand launching sa ika-500 katuig sa pag-abot sa imahe sa Sr. Sto. Niño dinhi sa Sugbo.
Ang kasaulogan adunay tema nga, “Sto. Niño, the abiding presence of the Father in our journey of faith”, kung diin nagtima-an sa pag-uban sa batang Hesus sa katawhan sulod na sa dugay nga panahon.
Karung hapon ipahigayon ang maong grand launching pinaagi sa usa ka santos nga misa sa Basilica Minore del Sto. Niño de Cebu kung diin pangulohan mismo ni His Excellency Most. Rev. Gabriele G. Caccia, D.D, ang Papal Nuncio to the Philippines ug pagasundan kini ug mga nagkadaiyang aktibidad.
