Gitugotan sa Regional Trial Court (RTC) Branch 27 sa Lapu-Lapu City, Cebu ang kontrobersyal nga kontraktor nga si Sarah Discaya nga makapiyansa og P1 milyon may kalabotan sa kaso nga malversation of public funds ug paglapas sa Anti-Graft and Corrupt Practices Act nga adunay kalabotan sa giingong ghost project sa Davao Occidental.
Gitugotan usab sa korte ang finance officer sa Department of Public Works and Highways (DPWH) sa Davao Occidental, nga si Czar Ryan Ubungen, nga makapiyansa og P300,000.
Sumala ni Judge Nelson Leyco sa RTC Branch 27, ang ebidensya nga gipresentar sa prosekusyon dili igo aron matanggong ang duha samtang nagpadayon ang pagdungog.
Giingon sa korte nga wala pa’y saksi nga nakapamatuod sa papel ni Discaya sa giingong anomaliya sa proyekto. Ingon man nga gikanayon nga wala pa mapamatud-i hangtod karon nga siya ang naghimo sa peke nga mga dokumento o nakigkunsabo sa laing akusado.
Samtang, gibalibaran sa korte ang piyansa sa walo pa ka mga akusado, lakip ang pipila ka mga opisyal sa DPWH ug usa ka opisyal sa St. Timothy Construction.
Sumala sa korte, mas lig-on ang ebidensya batok kanila, labi na sa giingong peke nga mga dokumento nga ilang gipirmahan mismo.
Giklaro sa korte nga ang paghatag og piyansa wala magpasabot nga ang akusado wala nay tulubagon. Hinuon, kini usa lamang ka pag-ila sa katungod sa usa ka akusado nga temporaryong makagawas samtang gidungog ang kaso.
Usab, ang pagdumili sa korte sa piyansa wala magpasabot nga ang akusado sad-an.
Si Sarah Discaya nag-atubang usab og lahi nga kaso nga may kalabotan sa giingong 53.9 milyon nga ghost project sa Calumpit, Bulacan.
