Gi-raid sa mga ahente sa National Bureau of Investigation – Central Visayas (NBI-7) ang usa ka panimalay sulod sa Vistamar Subdivision sa Barangay Mactan sa Dakbayan sa Lapu-Lapu sa alegasyong nagpadagan kini og illegal online fraudulent activities niadtong Miyerkules, Hunyo 4, 2025.
Ang maong pagpangronda kay konektado sa large-scale online scam operation diin nasuta nga ang modus sa maong operasyon kay usa ka Fake Dating Scam ug Fake Online Shopping nga pinadagan sa mga nagkadaiyang social media apps.
Nasikop sa mga awtoridad ang pipila ka ga computer sets ug smartphones ang gigamit sa maong operasyon sa scam hub nga nasutang gipanag-iya sa duha ka mga Taiwanese Nationals ug ang mga trabahante kay pulos mga Pilipino nga gikan sa Sugbo, Bohol, ug Northern Mindanao.
Sumala sa mga awtoridad subay sa ilang case build-up nga nag-operated ang maong scam hub sulod sa usa ka tuig.
Gani ang mga dinakpan kay mag-atubang og inquest proceedings sa korte nga posibling mag-atubang sa kasong Cybercrime Prevention Act nga adunay silot ngadto sa 12 ka tuig sa prisohan ug multa sa dili muminos sa P200,000.
Inubanan sa mga sakop sa Lapu-Lapu City Police Officer ug opisyales sa Barangay Mactan ang mga ahente sa NBI-7 atol sa nahitabong raid.
