Giklaro sa mga opisyal sa probinsya sa Sugbo nga ang sea ambulance nga gigamit sa Probinsya wala pa mapalit o pormal nga giabangan, bisan pa sa mga naunang post sa social media nga nagpresentar niini isip usa ka acquisition.
Kini ang gitataw atol sa deliberasyon sa budget sa Provincial Disaster Risk Reduction and Management Office (PDRRMO) niadtong Martes, Nobyembre 25.
Atol sa sesyon, gipangutana ni Board Member Celestino “Tining” Martinez III ang pangu sa PDRRMO nga si Dennis Pastor bahin sa P25 milyon nga alokasyon nga gituyo alang sa pag-abang sa mga sea ambulance. Usa ka post sa PIO niadtong Oktubre 7 diin nagpakita kang Cebu Gov. Pamela Baricuatro nga adunay sea ambulance, nga nagdala sa logo sa Probinsya, nga gihulagway nga “First-ever Sea Ambulance” sa Kapitolyo.
Laing post niadtong Nobyembre 12, gikan sa page ni Baricuatro diin nagpakita sa samang sea ambulance nga naghatud og mga tambal sa Isla sa Camotes sa usa ka misyon nga gihulagway nga kabahin sa vessel’s sea trial.
Hinungdan nga gipangutana dayon ni Martinez nganong gigamit na ang sea ambulance nga adunay logo nga “Province of Cebu” kon wala pa nahuman ang pagpamalit.
Gipasabot ni Pastor ug Provincial Budget Officer Danilo Rodas nga ang sea ambulance wala pa mapalit ug gihulam lang samtang nagppaabot sa gikinahanglan nga proseso sa pagpamalit.
Gihimug-atab usab ni Rodas nga walay kontrata tali sa Gobyerno sa Probinsya ug bisan unsang supplier, klaro ug tataw nga ang barko nihulman lang isip kabahin sa usa ka market survey o product testing.
Gidugang pa niini nga ang gibutang sa supplier ang logo sa “Province of Cebu” sa unit isip kabahin sa presentasyon sa marketing niini ug dili isip kumpirmasyon sa pagpanag-iya.
Samtang, gipangutana usab si PB Member Antonio Bacaltos Jr. kung kinsa ang manubag kung adunay aksidente nga mahitabo nga naglambigit sa gihulam nga barko, nga namatikdan nga kini nagdala sa insignia sa Probinsya.
Si Mandaue City Lone District Board Member Nilo Seno, usa ka abogado, miingon nga ang responsibilidad mahulog sa rehistradong tag-iya tungod kay walay kontrata ug ang Probinsya wala magpanag-iya o opisyal nga nag-abang sa unit.
