Gibalibaran sa Securities and Exchange Commission (SEC) ang hangyo sa Villar Land Holdings nga lugwayan ang deadline sa pag-file sa 2024 Annual Financial Statement (AFS) ug 2025 First Quarter (Q1) Report, ug gipahamtang ang administratibong multa nga dili moubos sa ₱12 milyones.
Gihangyo sa kompanya nga i-postpone ang deadline alang sa AFS gikan sa Abril 15 ug ang report sa Q1 gikan sa Mayo 15 hangtod Agosto 31.
Matod sa Villar Land, nangayo og dugang appraiser ang auditor niini aron sutaon pag-usab ang kantidad sa mga kabtangan sa kompanya.
Apan giinsister sa SEC nga dili paigo ang mga rason sa paghatag ug extension hilabi na kay makaapekto kini sa transparency ug pagsalig sa publiko sa merkado.
Sa miaging tuig, nitaas og maayo ang kita sa Villar Land human sa dakong revaluation sa mga investment property niini. Gikan sa ₱1.46 bilyon sa 2023, ang kinitaan sa kompanya niabot ug dul-an sa ₱1 trilyon, usa ka pagtaas nga giisip nga dili kasagaran sa industriya.
Samtang, wala pay opisyal nga pamahayag gikan sa Villar Land Holdings kalabot sa desisyon sa SEC.
