CEBU CITY- Opisyal nga gilusad sa Department of Transportation (DOTr) ang Libreng Sakay nga programa sa Sugbo, nga nagtimaan sa mahinungdanong lakang aron matubag ang mga panginahanglanon sa transportasyon sa usa sa pinakabusy nga urban nga mga dapit sa rehiyon, karung adlawa Miyerkules, Hulyo 23, 2025.
Gipangunahan ni Department of Transportation Secretary Vince Dizon ang paglusad sa Libreng Sakay program para sa Modern Public Utility Vehicles (MPUVs) sa Route 01K — gikan sa Parkmall Terminal sa Mandaue City hangtod sa Urgello, Cebu City.
Si Dizon personal nga misakay sa usa sa mga MPUV aron pagsusi sa rota ug pakiglambigit sa mga pasahero.
Adunay duha ka eskedyul sa oras alang sa libre nga biyahe kada adlaw – gikan sa 6 AM hangtod 9 AM ug 5 PM hangtod 8 PM.
Kini usa ka proyekto sa nasudnong kagamhanan sa pakig-alayon sa LTFRB, DOTr, ug LTO.
Si DOTr Secretary Vince Dizon niingon nga sa ilang pagpalapad sa programa gitun-an sa LTFRB ang pagpatuman og laing rota nga mao ang Talisay City paingon sa IT Park ug vice versa.
Sa pikas bahin, nakigtagbo si Secretary Dizon nila ni Cebu Governor Pamela Baricuatro ug Cebu City Mayor Nestor Archival aron hisgutan ang pagkompleto sa Cebu Bus Rapid Transit (CBRT) project.
Ang coordination meeting gipahigayon sa Cebu Provincial Capitol.
Dinhi, gikompirmar ni Dizon, nga ang trial run sa Phase 1 sa Cebu Bus Rapid Transit Project magsugod sa Septiyembre ning tuiga.
Libre ang mga sakay alang sa mga commuter samtang anaa pa kini sa pagsulay, nga adunay labing menos 20 ka mga bus nga gilauman nga mag-operate.
Matod ni Dizon nga 95% na ang nahuman sa Phase 1 sa proyekto.
