Gipahugtan ang seguridad sa tanang pampubliko ug pribadong eskwelahan tungod sa nahitabong pagpamusil sulod sa usa ka pribadong senior high school sa Zamboanga nga mikalas og duha ka kinabuhi.
Basi sa opisyal nga pamahayag nga gipagawas ni Cebu Governor Pamela Baricuatro, adunay usa ka direktiba alang sa PNP Provincial Director ug sa tanang Chiefs of Police (COPs) nga mopahigayon og mga inspeksyon ug dugangan ang seguridad sa mga eskwelahan.
Gimandoan sila sa pagpahigayon og dinalian nga mga inspeksyon ug sa pagpataas sa lebel sa seguridad sa tanang pampubliko ug pampribadong tunghaan sa mga tunghaan.
Agi og suporta ug dugang nga siguro sa kaluwasan sa mga estudyante, nagpagawas usab og opisyal nga mando si PNP Provincial Director Col. Mangellen, diin pormal niyang gipatuman ang “one-police-to-school deployment scheme,” diin adunay itudlo ug ideploy nga mga opisyal sa kapulisang magbantay sa matag eskwelahan.
Samtang sa pikas bahin, si Talisay City Mayor Samsam Gullas nagpagawas og usa ka pamahayag, nga nag-una sa seguridad sa mga eskwelahan sa siyudad taliwala sa bag-ohay nga mga insidente ug mga hulga sa tibuok nasud.
Nagpahayag siya sa iyang kabalaka alang sa kaluwasan sa mga estudyante ug sa panginahanglan nga sulbaron ang mga hinungdan niining mga problema, labi na kadtong naggikan sa bullying.
Diin, aron matubag kini, ang lokal nga gobyerno nagpahigayon og mga seminar bahin sa anti-bullying ug cyberbullying uban sa tanang eskwelahan ug mga guidance counselor aron makahimo og klaro nga mekanismo diin ang mga bata adunay koneksyon ug moduol sa husto nga indibiwal ug sa pulis kung sila makasinati og bullying.
Dugang pa, ang siyudad nakapalit usab og 100 ka metal detector nga gitugyan ngadto sa Department of Education (DepEd), ug ang tanang security guard uban sa mga disaster head sa matag eskwelahan nakaagi na og special training ug edukasyon sa hustong paggamit sa kagamitan.
Gawas sa naandan nga earthquake ug fire drills, si Mayor Gullas nagplano usab nga makig-alayon sa kapulisan aron ipatuman ang active shooter drills sa mga eskwelahan aron masiguro nga ang tanan andam kung adunay mahitabong wala damha nga insidente.
