BOMBO EXCLUSIVE: Gikuwestyon ni Sen. Imee Marcos ang sunod-sunod nga pagpanghimakak sa nagkadaiyang ahensya sa gobyerno kalabot sa giingong operasyon batok kang Sen. Ronald “Bato” dela Rosa.
Sa eksklusibong pakighinabi sa Bombo Newsteam, gipahayag ni Marcos nga nakurat siya tungod kay sunod-sunod nga nanghimakak ang nagkalainlaing opisyal ug ahensya sa gobyerno, lakip ang Malacañang ug ang National Bureau of Investigation (NBI), nga giingong wala nagmando sa pagdakop kang Dela Rosa.
Matud sa senadora, klaro nga adunay mga personahe gikan sa NBI sa maong insidente tungod kay adunay nadakpan nga nagpaila nga konektado sa ahensya ug miangkon pa nga gimandoan siya sa iyang superior.
Gipadayag usab ni Marcos nga adunay tactical bag ug mga identification card (ID) nga nabilin sa dapit, nga maoy gigamit nilang basehan sa ilang alegasyon nga adunay operatiba sa NBI nga nalambigit sa insidente.
Gikumpirma pa sa senadora nga nakigsabot na sila kang Interior and Local Government Secretary Jonvic Remulla alang sa usa ka hiniusang imbestigasyon, apan nabalaka siya nga adunay mga opisyal nga naghatag na dayon og konklusyon bisan wala pa’y pormal nga imbestigasyon.
Gipasabot usab niya nga kinahanglan sundon ang saktong legal nga proseso kon ugaling adunay warrant gikan sa International Criminal Court (ICC) batok kang Dela Rosa. Matud niya, kinahanglan una ipakita ang maong warrant ug moagi kini sa proseso pinaagi sa Interpol, Philippine Center on Transnational Crime, ug sa korte sa Pilipinas sa dili pa kini ipatuman.
Gihisgutan usab ni Marcos nga dili angay masubli ang iyang gihulagway nga “estilo sa pagkidnap” sama sa nahitabo kang kanhi Presidente Rodrigo Duterte, diin matud niya, kinahanglan usisahon una sa lokal nga korte sa dili pa himoon ang bisan unsang operasyon.
Dugang pa sa senadora, ang mga alegasyon batok kang Dela Rosa ug Duterte adunay kalabotan sa mga panghitabo sa Pilipinas, busa kinahanglan nga masunod gihapon ang Konstitusyon ug ang mga balaod sa nasud.
