Gikumpirma ni Senator Juan Miguel “Migz” Zubiri nga opisyal nga mibalhin si Senator Mark Villar ngadto sa Senate Majority bloc gahapong adlawa, Huwebes, Oktubre 8.
Gihimakak usab ni Zubiri nga adunay kalabotan sa impeachment trial ang pagbalhin ni Villar gikan sa minority ngadto sa majority bloc sa Senado.
Matod ni Zubiri, dugay na nga kabahin sa majority si Villar ug temporaryo lang nga nahisakop sa minority.
Gibutyag niini nga nakig-istorya sila kang Villar, kinsa nagpahayag sa iyang tinguha nga mobalik sa majority aron mas makatrabaho siya sa mga komite ug mas aktibong makaapil sa pagmugna og mga balaod.
Tungod sa pagbalhin ni Villar, misaka ngadto sa 14 ang kinatibuk-ang gidaghanon sa mga miyembro sa Majority bloc, samtang nagpabilin sa 10 ang gidaghanon sa mga miyembro sa Minority bloc sa Senado.
Human sa iyang pagbalhin, napili si Villar isip bag-ong chairman sa Senate Committee on Public Works and Highways aron mangulo sa mga lakang ug diskusyon kalabot sa imprastraktura.
Gawas sa iyang bag-ong posisyon isip chairman, napili usab ang senador isip usa sa mga miyembro nga magrepresentar sa Senado sa Commission on Appointments (CA).
Ang opisyal nga pagbalhin ni Villar sulod sa Upper House gilaumang makapalig-on sa lehislatibong agenda sa Majority bloc.
Sa wala pa siya napili sa Senado, nagserbisyo si Villar isip Secretary sa Department of Public Works and Highways (DPWH) ubos sa administrasyong Duterte, diin gidumala niya ang mga dagkong proyekto sa publiko ubos sa programang “Build, Build, Build”.
Ang iyang halapad nga kasinatian sa sektor sa imprastraktura sa publiko maoy nagsilbing nag-unang basehan sa iyang pagkatudlo sa maong komite.
