Giakusahan ni Senate President Alan Peter Cayetano nga gihadlok ang pipila ka miyembro sa Senate majority sa administrasyong Marcos aron pugson sila nga mobalhin ngadto sa minority ug magporma og bag-ong liderato sa Senado.
Sumala sa live stream post ni Cayetano gahapon Biyernes, Mayo 29, ang senador mopagawas og ebidensya sa giingong pagpanghadlok aron mapugngan ang pagporma og usa ka “independent Senate.”
Gipasiugda niya nga adunay mga alegasyon nga ang pipila ka mga magbabalaod napugos sa pagbalhin og grupo baylo sa dili pagpasaka og mga kaso, samtang kadtong dili mobalhin mapasakaan og kaso.
Samtang, gikan sa Tokyo, si President Ferdinand Marcos Jr. mitubag sa pahayag ni Senador Rodante Marcoleta nga ang kasamtangang liderato sa Senado lamang ang wala’y pagtugot sa Malacañang.
Taliwala sa mga isyu sa Senado, daghang mga miyembro sa majority bloc ang nag-atubang og mga kasong criminal, lakip kanila mao si Sen. Jinggoy Estrada nga gikasuhan og plunder ug graft.
Sumala sa Office of the Ombudsman, ang acting majority leader nga si Joel Villanueva ang sunod nga pasakaan og kaso sa korte, samtang sila si Sen. Francis Escudero ug Rodante Marcoleta nag-atubang usab og mga kasong plunder.
