Gipahugtan ni Senador Panfilo “Ping” Lacson ang pipila ka lagda alang sa pagdungog sa Senate Blue Ribbon Committee bahin sa eskandalo sa flood control projects.
Atol sa unang pagdungog ni Senador Lacson isip chairman sa komitiba niadtong Septiyembre 18, ang Senador nilatid og mas estrikto nga mga lagda sama sa pagsunod sa lima ka minuto nga limitasyon sa oras sa pagpangutana sa matag kaubang senador, nga wala maglakip sa mga tubag sa mga resource person.
Estrikto usab nga gisunod sa chairman sa komitiba ang follow-up nga pangutana nga ipunto sa matag senador samtang nangutana ang laing kaubanan.
Kon mosunod pa ang laing pangutana, bawion kini sa oras sa kasamtangang senador nga nangutana.
Matod ni Lacson, hugot nga sundon ang katungod sa legal nga representasyon sa matag resource person apan matod niya dili gyud sila tugotan nga manubag o makiglalis sa mga senador.
Wala usab gitugotan nga i-serve ang mga pagkaon sulod sa komitiba apan ang mga partisipante gihatagan lang og 30 minutos nga lunch break.
Gihimug-atan ni Lacson nga ang pagsunod sa maong mga guidelines kabahin sa tinguha sa komitiba nga mahatagan og kahigayonan ang tanang senador sa pagpangutana ug pagpagawas sa impormasyon nga ilang gihuptan kalabot sa anomaliya sa flood control structures, uban sa tinguha sa komite nga mahibaw-an ang sunodsunod nga mga kahiwian sa mga proyekto.
