Sirado usa ang Senado alang sa mga sesyon ug mga miting karong Lunes, Disyembre 1 aron tugotan ang pagpanglimpyo ug assessment human sa sunog nga miulbo sa building.
Apan ang suspensyon dili maglakip sa mga empleyado gikan sa seguridad, maintenance, ug general services nga nagpadayon sa pag-duty aron masiguro ang kaluwasan ug kahusay sulod sa compound.
Gipasalig ni Senate President Vicente “Tito” Sotto III nga walay importanteng mga dokumento nga nadaot tungod sa insidente.
Sumala sa Bureau of Fire Protection (BFP), ang sunog nagsugod sa ikaduhang andana sa building ug dali nga napalong human sa kapin usa ka oras nga operasyon sa pagpalong sa sunog.
Base sa inisyal nga mga report, ang gasto sa kadaot sa pipila ka mga opisina ug kagamitan gibanabana nga mokabat sa P1.2 milyones.
Nagpadayon sa ilang imbestigasyon ang BFP ug Senate Sergeant-at-Arms aron mahibal-an ang hinungdan sa sunog ug ang kinatibuk-ang gidak-on sa kadaot.
Samtang, ang liderato sa Senado nanawagan sa publiko nga magpabiling kalmado ug gipasalig nga ang ilang mga kalihokan ipadayon sa diha nga mahuman ang pagpanglimpyo ug masiguro ang kaluwasan sa building.
