Gisuportahan ni Cebu City Councilor Joel Garganera ang gihimong Senate inquiry sa kahimtang sa Binaliw Sanitary Landfill, ug giingong ang maong imbestigasyon maoy higayon aron mapanubag ang mga responsable ug masiguro ang kaluwasan sa publiko.
Matod ni Garganera, wala pa gihapon nila makita ang resulta sa structural assessment nga giingong gihimo sa Environmental Management Bureau (EMB) ug Department of Environment and Natural Resources (DENR), bisan pa sa dugay nang mga reklamo sa mga residente ug truck drivers kabahin sa kahimtang sa landfill.
Gipasiugda sa konsehal nga kinahanglan ipakita sa mga otoridad kon unsay mga lakang nga ilang gihimo human sa pag-agi sa Bagyong Tino ug sa mga seismic activities o linog nga nakaigo sa siyudad, lakip na kung adunay gihimong structural assessment ug uban pang intervention aron masiguro nga luwas ang landfill.
Gikritikar usab ni Garganera ang wala pag-apil sa Cebu City Disaster Risk Reduction and Management Office (CDRRMO) ug mga structural engineers sa monitoring ug assessment sa landfill, nga matud pa niya maoy adunay teknikal nga kahibalo sa pagtino kon luwas pa ba ang maong pasilidad.
Dugang pa niya, dugay na niyang gipadayag pinaagi sa privilege speech ang kabalaka sa kataas sa tambak sa basura, ilabina sa panahon sa ulan diin adunay posibilidad nga mogawas ang leachate ug mahimong hinungdan sa peligro kung dili husto ang pagdumala.
Gipahinumdoman usab ni Garganera nga ang 2023 Commission on Audit (COA) report mismo nagtimaan nga anaa na sa kritikal nga kahimtang ang Binaliw landfill, apan wala gihapon matubag ang daghang mga isyu nga ilang dugay nang gipangreklamo.
Busa, naglaum ang konsehal nga pinaagi sa Senate inquiry, mahimo ang usa ka independente ug transparenteng imbestigasyon aron mahibaw-an ang tinuod nga kahimtang sa landfill, mahibaloan kon adunay napakyas sa ilang responsibilidad, ug mapalig-on ang mga lakang aron dili na mausab ang mga insidenteng mahimong magbutang sa peligro sa kinabuhi sa publiko.
