PROVINCE OF CEBU-Nakig-areglo na ang dayber sa mini-SUV nga nibangga sa glass wall panel sa usa ka sikat nga fast-food restaurant sa lungsod sa Moalboal, Huwebes, Abril 11, 2024.
Giila ni Police Captain Claudio Gako, ang hepe sa Moalboal Police Station ang drayber sa Suzuki Jimny automatic nga si Anatalio Cardente Jr., 64, taga San Roque Village, Barangay Calamba, dakbayan sa Sugbo.
Dugang pa, nga basi sa imbistigasyon nga ilahang gihimo, nasuta nga nangandam si Cardente nga mo-park sa maong lugar dihang nadasmagan niya ang ikog nga bahin sa Metro Link bus nga gimaneho sa taga lungsod sa Alegria nga si Archie Rodriguez, kinsa nagdiskarga og pasahero.
Tungod niini, nawad-an og kontrol si Cardente sa sakyanan ug midiretso sa sulod sa maong kan-anan, ug nabuak ang bildo ingun man ang wall panel niini,apil usab ang mga lingkoranan ug ang mga lamesa sa sulod.
Gumikan sa maong panghitabo naangol ang 33-anyos nga kustomer nga si Niño Besa ug gidala kini sa mga rescue team sa Moalboal ngadto sa Badian District Hospital aron matambalan.
