PROVINCE OF CEBU- Nagpaalim karon sa tambalanan ang usa ka 72-anyos nga senior citizen human kini makadaghang higayon nga gitigbas sa iyang silingan didto sa Sitio Kayapok-yapokan, Barangay Manlapay, sa lungsod sa Dalaguete, pasado alas-2 sa hapon niadtong Sabado, Hulyo 13.
Giila sa kapulisan ang biktima nga si Felipe, samtang ang suspek mao ang iyang silingan nga si Enrico, 55 anyos.
Base sa imbestigasyon sa Dalaguete Police Station, malinawong naglingkod ang biktima sa pultahan sa iyang panimalay sa dihang kalit lang nga niabot ang suspek. Sa wala’y igong rason, daling nibunot og sundang si Enrico ug sa makadaghang higayon niini nga gitigbas ang biktima.
Nakaangkon og seryosong samad-tinigbasan sa iyang liog si Felipe, kinsa daling gidala sa Mantalongon Rural Health Unit alang sa dinaliang medikal nga pagtambal.
Pinaagi sa dinaliang operasyon sa kapulisan, malampuson nga nadakpan ang suspek ug narekober gikan kaniya ang usa ka sundang nga may gitas-on nga 16 ka pulgada (inches) nga aduna pa’y lama sa lab-as nga dugo.
Gikataho nga posibleng adunay kakulian o deperensya sa panghunahuna ang suspek, sanglit giingong nakalimot kini sa iyang mangilngig nga gibuhat human sa insidente.
Tungod niini, mipahimangno si Police Major Vincent Zozobrado, ang hepe sa Dalaguete Police, ngadto sa publiko nga likayan ang mga dautang bisyo, ilabi na ang paggamit ug pagpayuhot sa ilegal nga drugas, tungod kay dako kini og epekto sa maayong pangisip sa usa ka tawo.
Sa pagkakaron, ang suspek detinado na sa selda sa kapulisan ug mag-atubang og kasong frustrated murder.
