CEBU CITY– Mitumaw ang sunod-sunod nga shooting incident sa Sugbo karong hapona, adlawa’ng Martes Enero 7, 2020.
Patay ang usa ka habal-habal driver human gipusila sa wala pa matino nga suspect sa may Rizal St. Barangay Basak San Nicolas.
Giila ang biktima nga si Arnold Alvano, 37 anyos.
Sa initial investigation, wala pa masuta sa pulis ang tinood nga nahitabi gumikan kay sigon sa mga nakasaksi nga riding in tandem ang mitira sa biktima samtang sigon usab sa lain pang saksi nga naglakaw lang ang biktima ug kalit nga gipusil ang biktima nga naigo sa ulo.
Samtang pipila ka oras lang ang nakalabay, gipusil usab ang usa ka lalaki sa Sitio All Season Brgy. Cogon, Pardo.
Giila ang biktima nga si Arnel Salandron, hingkod ang panuigon ug tigbaligya og ‘masi’.
Photo by Bombo Eric Amaro
Matud sa imbestigasyon, gipusil ang biktima samtang naglibod sa iyang tinda.
Padayon usab nga giimbestigaran karon sa pulis ang mga nahitabong pagpamusil.
