Ilakip sa House prosecution panel alang sa impeachment trial ang usa ka court sheriff nga nalambigit sa usa ka kontrobersyal nga insidente uban ni Vice President Sara Duterte kaniadto.
Base sa pre-trial brief sa mga prosekutor, si Abe Andres usa sa walo ka mga saksi nga gilauman nga motestigo kalabot sa mga alegasyon batok kang VP Sara.
Si Andres mao ang sheriff nga nagpatuman sa demolition order sa usa ka gikuwestiyong yuta sa Barangay Soliman, Agdao District sa Davao City niadtong 2011, diin nahitabo ang usa ka komprontasyon uban sa kanhi mayor nga si Duterte.
Sa maong insidente, gikataho nga nakaangkon og mga samad ug bun-og si Andres human giingong gisumbag sa nawong ug likod sa kanhi mayor, hinungdan nga gidala kini sa ospital.
Sumala sa House prosecution panel, ang testimonya ni Andres gamiton aron suportahan ang ilang alegasyon nga ang Bise Presidente adunay kasaysayan sa paggamit og puwersa o kapintasan.
Apil usab sa listahan sa mga saksi ang pipila ka mga miyembro sa nagkadaiyang ahensya sa pagpatuman sa balaod ug mga tigbalita nga adunay kalabotan sa mga isyu nga nakalatid sa impeachment complaint.
Usa sa mga unang isyu nga gilauman nga tukion sa prosekusyon sa husay mao ang alegasyon sa giingong mga hulga batok sa kinabuhi ni Presidente Ferdinand Marcos Jr., First Lady Liza Araneta-Marcos, ug kanhi House Speaker Martin Romualdez.
Matud sa mga prosecutor, ang maong mga testimonya makatabang sa pagpresentar sa kinatibuk-ang basehan ug gibug-aton sa impeachment complaint batok sa Bise Presidente.
