CEBU CITY-Mihangyo ang mga sidewalk vendor sa Calamba cemetery nga dili lang una sila papahawa-on karung Oktubre 28, adlaw nga Lunes.
Sa pakighinabi sa Bombo News Team ni Nita Sereño, mamaligya-ay ug buwak ug kandila, matud pa nga nakadawat na sila ug notice gikan Prevention, Restoration, Order, Beautification and Enhancement (PROBE) Team nga kinahanglan na sila nga boluntaryo nga mubakante sa sidewalk sa nahisgutang sam-ang sa dili pa maabot ang PROBE sa gikatakda nga adlaw.
Sigon pa nga hangyo lang nila nga pagkahuman na lang sa Kalag-Kalag sila papahawa-on gumikan kay mas daghan sila ug kita sa Nobyembre 1 ug 2. Giingung tagsa lang ni ang maong okasyon hayan hatagan lang unta usab sila ug higayon.
Nasayran nga sa pagkakarun, barato pa ang mga kandila ingun man buwak, apan aduna na’y nagsugod ug bisita sa naasoy nga sam-ang arun nga manglimpyo sa mga nitso.
Samtang, alang sa mga magpata-ud ug suga, mukantidad kini ug P300 diin butangan ug suga ang mga nitso sugod Oktubre 31 hangtud na sa Nobyembre 2.
