CEBU CITY – Wala matagbaw ang mga sidewalk vendor sa nakab-ot nga panagsabot nila tali ni Cebu City Mayor Edgardo Labella kauban ang kadagkuan sa DILG.
Gipahibalo ni Wilma Cabo, ang presidente sa Colon Vendors Association, nga patindahon sila pagbalik sa dalan Colon apan sa matag adlaw lang nga Sabado ug Dominggo.
Matud pa nga walay limit sa oras ang ilahang pagpaninda sa mga nahisgutang adlaw ug gitagan-an lang sila ug 2×2 nga sukod sa lamesa.
Apan gitataw ni Cabo nga dili kini mao ang ilahang gihangyo ni Mayor Labella ug sa DILG inay mao nga makabalik na sila sa hingpit ug makatinda na sila sa kada adlaw.
Gidugang pa niini nga ang night market usab ang dili pa igo gumikan kay ‘seasonal’ lang kini diin panahon lang kini sa Pasko hangtod sa Sinulog.
Bisan pa man niini, gipadayag ni Cabo nga wala na sila’y mahimo ug igo na lang nga mutuman sa maong kasabotan ug misaad nga ipabilin nila ang kahapsay ug kalimpyo sa kadalanan samtang sila maninda sa adlaw nga Sabado ug Dominggo.
