CEBU CITY-Dili angayan matud pa nga hikawan sa simbahan ang mga kabos nga nagkinahanglan ug tabang.
Gibutyag ni Dr. Ryan Maboloc, usa ka political analyst sa Ateneo De Davao, sa dihang nahinabi sa Bombo Radyo Cebu atol sa tulumanong Bombohanay Bigtime nga ma-simbahan man o estado, dili angayan nga mutalikod sa mga nagkinahanglan, ma-dato man o labing kabos nga mga tawo.
Matud pa nga dako ug papel ang Simbahan sa pagsangyaw sa matag pulong sa Diyos diin ang matag usa gikinahanglan nga maki-angayon ug dili mangabuso sa isig kaingon.
Sigon pa nga ang Simbahan ang naghisgot kabahin sa gugma hinungdan nga angayan kini nga tumanon pinaagi sa lihok ug dili lang sa pulong.
Nagkanayon kini nga ang Simbahan ug ang gobyerno, bisan pa man ug nakalatid sa Batakang Balaud ang “separation of the church and the state”, gikinahanglan nga magtambayayong sa pagtabang sa mga nagkinahanglan ilabi niining panahon sa pandemya.
Mahinumduman nga adunay midangop sa Bombo Radyo Cebu niadtong nakalabay nga semana human napasa-pasa simbahan ug sa mintiryo sanglit dili malubong ang bana niini gumikan kay walay ikabayad nga 10 mil pesos. | SBR/FDP
