Nangandam na ang mga miyembro sa Cebu Anti-Corruption Coalition aron hisgutan ang mga kalihokan alang sa ikaduhang hugna sa Sugboanong Pakigbisog Kontra Korapsyon o SuPaKK 2.0.
Tungod niini, nagpahigayon sila og press conference karong adlawa, Pebrero 22, 2026, sa Filipiniana Hall, Archbishop’s Palace sa Dakbayan sa Sugbo, isip kabahin sa pagpangandam sa umaabot nga kalihokan sa Pebrero 25 nga pagahandum sa ika-40 nga anibersaryo sa 1986 EDSA People Power Revolution.
Matud ni Fr. Jose Pagdiong, SVD sa Roman Archdiocese sa Sugbo, ang kalihokan dili lamang ordinaryong panagtigom, kondili usa ka paghinumdom sa diwa sa EDSA People Power ug pagpalig-on sa panawagan alang sa maayong pangagamhanan sa nasud.
Gipasiugda usab ni Fr. Pagdiong nga dili tugotan ang mga politiko nga modiskurso atubangan sa publiko aron malikayan ang pamolitika sa maong kalihokan ug masiguro nga magpabiling non-partisan kini.
Pagasugdan ang kalihokan pinaagi sa Santos nga Misa sa Santo Niño Pilgrim Center alas 1:00 sa hapon.
Human niini, sundan dayon og symbolic ug peaceful march nga pagatambongan sa nagkalainlaing sektor sa katilingban, nagkadaiyang pagtuo, civic groups, ug nagkalainlaing baruganan sa politika, apan nagkahiusa batok sa komon nga hulga sa kaayohan sa katawhang Pilipino.
Aduna usab ipahigayon nga cultural concert nga pagatambongan sa mga inilang banda ug personalidad.
Sa eksaktong alas 3:00 sa hapon, dungan usab pagabagtingon ang mga kampana sa mga simbahan isip simbolo sa panaghiusa ug paghinumdom.
Giawhag sa mga organizers ang mga partisipante nga magsul-ob og puti nga sinina isip simbolo sa panaghiusa ug kalinaw.
Samtang kadtong walay puti nga sapot mahimong magsul-ob og puti nga wristband o headband.
