Malampuson ug malinawon nga natapos ang Sinulog 2026 Grand Parade human gibana-bana nga miabot sa 5.2 milyon ka mga tawo ang misaksi sa tinuig nga selebrasyon.
Sumala ni Police Col. George Ylanan, ang Officer-in-Charge (OIC) City Director sa Cebu City Police Office (CCPO), kini nga crowd estimate gibasi sa opisyal nga datos nga gipagawas sa Cebu City Disaster Risk Reduction and Management Office (CCDRRMO).
Matud ni Col. Ylanan, bisan pa man sa bagat nga pundok sa katawhan sa rota sa parada ug sa Cebu City Sports Center, nagpabiling “generally peaceful” o malinawon ang dagan sa kapistahan.
Hinungdan nga iyang gipasidunggan ang kapulisan tungod sa sayo nga pagpangandam ug ang hugot nga koordinasyon sa nagkalain-laing ahensya sa gobyerno ug force multipliers.
Dugang sa report sa CCDRRMO, ang pagdagsang sa minilyon ka deboto ug turista nakasinati lamang og ginagmay nga insidente sama sa pagkalipong tungod sa kainit sa adlaw ug dehydration, apan dali ra kining naatiman sa mga medical teams nga gipakatap sa tibuok syudad.
Nasayran usab nga ang maong gidaghanon sa tawo giingong usa sa labing dako sa kasaysayan sa Sinulog, ilabi na nga mibalik na sa hingpit ang kadasig sa mga pasundayag ug mga contingent gikan sa nagkalain-laing dapit sa nasud.
