Pormal nang gisugdan ang ika-455 nga kasaulugan sa Sinulog pinaagi sa usa ka engrandeng opening salvo kagahapon.
Gisugdan kini pinaagi sa usa ka misa atol sa nobenaryo sa Fiesta Señor sa Basilica Minore del Sto. Niño.
Napuno sa hudyaka ang Sugbo, ilabi na sa mga deboto sa balaang bata human nga pormal nang gisugdan ni Cebu City Mayor Edgardo Labella ang fiesta sa Sinulog.
Gisundan kini sa usa ka mabulukon nga parada diin misayaw ang 18 ka mga contingents gikan sa managlahing tunghaan sa Metro Cebu ug giduyugan kini sa mga sakop sa Boy Scouts ug Girl Scouts, mga kandidata sa Binibining Cebu, ug mga delegado sa Sinulog sa Palaboy nga naglangkub sa mga batang libud-suroy.
Nagparada sila sa Osmeña Boulevard, dayon og liko sa Fuente Osmeña Rotunda, ug diretso sa Cebu City Sports Center.
Gisundan kini sa usa ka ritual showdown sulod sa CCSC ug nahuman ang opening salvo pinaagi sa fireworks display.
Ipahigayon karong adlawa ang Sinulog sa Kabataan sa Lalawigan ug gisundan kini sa Sinulog sa Dakbayan karong Enero 12.
