Anaa na sa 80% ang kaandam sa kagamhanang dakbayan sa Sugbo sa preparasyon niini sa Sinulog 2026 Grand Parade and Ritual Showdown.
Kini ang gipamahayag ni Cebu City Councilor Dave Tumulak, kinsa sakop sa organizing committee sa kapistahan nga mao ang Sinulog Foundation Inc. (SFI) sa pakighinabi niini sa mga sakop sa tigbalita niadtong Martes, Enero 13, 2026.
Matod pa ni Tumulak nga ang nahabiling 20% nga andamanon pa kay mao nalang ang technical set-up sama sa lights and audio equipments.
Gani gipasalig pud sa konsehal nga ang security deployment nga gipangulohan sa Cebu City Police kay nakaandam na sa ilang assigned position ingon man ang mga contingents lakip na atong mga gikan pa gawas sa probinsya sa Sugbo sa ilang pagpahimutang sa mga billeting areas.
Ingon man nga giklaro sab sa opisyal nga libre ang pwesto sa mga bleachers nga ipahimutang sa rota sa street parade nga giplastada sa Dakay Constuction and Development Corp. diin magpasundayag sa ilang Street Parade Dance entry ang mga contingents apan ang mga portalets kay manukot kini sa P5 ngadto na sa P10 nga bayad.
Giawhag sa opisyal ang publiko nga suportahan ang mga paningkamot sa dakbayan sa tinguha nga masaulgo ang Sinulog 2026 nga hapsay, malinawn, ug lingaw para sa tanan.
