TALISAY CITY – Sikop ang usa ka SK chairperson human nga nasakmitan ug linibo nga kantidad sa ginadiling drogas atol sa gipahigayong buy bust operation sa mga sakop sa Talisay Police Station sa Barangay Lawaan III, dakbayan sa Talisay.
Giila ang maong SK Chairwoman nga si Guendolyn Tavera Luague.
Sa pakighinabi sa Bombo Radyo Cebu kang Talisay PNP chief Police Major Gerard Ace Pelare, gibutyag niini nga nahimo nilang subject ang maong SK official human nga una na nilang gisilbihan ug search warrant ang amahan niini nga si Francisco Luage, 59 anyos, ug kanhi hepe sa mga tanod sa nahisgutang barangay.
Matud pa nga ilahang gikunsidirar nga mga High Value Individual ang duha gumikan sa gilapdon sa kalambigitan niini sa illegal drug trade.
Nasayran nga nahimo usab nga right-hand ang maong barangay tanod sa napatay nga gitudlong bigtime drug lord nga si Steve Go.
Nag-atubang og kasong kalapasan sa Republic Act 9165 o Comprehensive Dangerous Drugs Act of 2002 ang mga suspetsado.
Samtang, gihimug-atan ni Police Major Pelare nga magpadayon ang ilang intensified illegal drug operations sa mga lugar sa dakbayan diin baga ang iligal nga drogas.
Kahinumduman nga subling gibutyag ni Presidente Rodrigo Duterte atol sa pagbisita niini sa Sugbo niadtong Sinulog Festival, nga nagpabiling hitak ang iligal nga drogas sa siyudad sa Talisay.
