Gipagawas sa kapulisan sa South Korea ang hinungdan sa kalit nga kamatayon sa aktres sa South Korea nga si Kim Sae Ron sa edad nga 24-anyos.
Basi sa mga taho, usa ka opisyal sa kapolisan ang mikompirmar nga sila nagtuo nga ang aktres mihimo og extreme choice ug nakahukom nga mag-suicide.
Matod sa mga awtoridad, walay gibilin nga note ang aktres sa iyang balay diin nakit-an kini sa iyang higala nga wala nay kinabuhi niadtong Domingo, Pebrero 16, ug walay timailhan sa foul play.
Nailhan ang namatay nga aktres isip sikat nga child star tungod sa mga halandumon nga papel o karakter nga iyang gidala sa Korean films ug pipila ka Korean drama series.
Apan, kalit nga nahunong ang acting career sa aktres human sa kontrobersiya nga iyang nalambigitan dihang nakonbikto siya sa pagdrayb ubos sa impluwensya sa alkohol niadtong 2022 ug gipamulta og 20 million Korean won (KRW), nga niani og nagkadaiyang pagsaway sa Korean netizens.
