Gianunsyo ni South Korean President Lee Jae Myung nga iyang ipatuman ang pipila ka mga kasabutan sa militar sa utlanan tali sa South Korea ug North Korea isip kabahin sa iyang lakang sa pagpalambo sa relasyon tali sa duha ka mga nasud.
Sa usa ka pakigpulong nga nagtimaan sa ika-80 nga anibersaryo sa pagkalingkawas sa Korea gikan sa okupasyon sa Hapon, si Lee miingon nga ibalik nila ang September 19 Comprehensive Military Agreement, usa ka kasabutan nga gipirmahan kaniadtong 2018 nga nagtumong sa pagpakunhod sa mga tensyon sa utlanan pinaagi sa pagpahunong sa pipila nga mga kalihokan nga may kalabotan sa militar.
Kahinumduman nga nabungkag ang kasabutan human nigrabe ang tensyon niadtong 2023, dihang gisuspenso kini sa North Korea ug ni kanhi South Korean President Yoon Suk Yeol niadtong Hunyo 2024 human ang North Korea nagpadala og mga balloon nga adunay basura ngadto sa South Korea./
Ang mga probisyon sa kasabutan naglakip sa paghunong sa military drills duol sa utlanan, pagdili sa live-fire exercises, pagtukod ug no-fly zones, ug ang pagtangtang sa pipila ka guard posts sa Demilitarized Zone (DMZ).
Dili pa klaro kung giunsa pagtubag sa Pyongyang ang lakang, labi na nga balik-balik nga gisaway ang mga inisyatibo sa kalinaw ni Lee.
Samtang, gipaboran usab ni Lee ang “forward-looking” nga relasyon sa Japan base sa interes sa South Korea. Gilauman nga mobisita siya sa Tokyo sa Agosto 23 alang sa usa ka summit kauban ang Punong Ministro sa Hapon nga si Shigeru Ishiba, samtang ang mga taripa gikan sa administrasyon ni Presidente Donald Trump mahimong epektibo.
