Apil si Solenn Heussaff sa mga 15 ka Pilipinong artista nga mopasundayag sa Paris Art Week sa France, nga molungtad hangtod sa Oktubre 29.
Ipasundayag sa mga artista ang ilang mga obra sa grupong exhibition nga nag-ulohan og “Manille A’ Paris: Contemporary Dialogues,” nga giorganisar sa DF Art Agency ug Galerie D’Antoine, uban ang tabang sa FOCUS Asia Contemporary Art. Gipakita niini ang nagkalain-laing matang sa kontemporaryong art gikan sa Pilipinas.
Kauban ni Solenn sila si Gus Albor, Anna Bautista, Jana Benitez, Olivia d’Aboville, Cedrick Dela Paz, Pete Jimenez, Lilianna Manahan, Raffy Napay, Demi Padua, Michelle Perez, Pongbayog, Marrie Saplad, ug Jorge Yulo.
Pinaagi sa Instagram, gipaambit ni Solenn ang iyang gibati mahitungod sa iyang pag-apil sa exhibition, ug matud niya nga daw nakabalik siya sa sinugdanan pinaagi sa pagbalik sa Paris.
Ang model-artist, kinsa usa ka French-Filipino, migahin sa iyang mga ting-init sa kaulohan sa France samtang nagdako, ug mipuyo usab didto sulod sa tulo ka tuig isip estudyante sa kolehiyo.
