CEBU – Dili ‘familiar’ ug wala’y ideya si Senate President Vicente ‘Tito’ Sotto III sa track record ni newly-appointed PNP Chief Police Major General Debold Sinas.
Sa eksklusibo nga pakighinabi sa Bombo Radyo ni Senator Sotto, gibutyag niini nga wala kini masayod sa ‘track record’ ni Sinas ilabi na sa kampanya batok iligal nga drogas.
Matud pa nga ipangutana unya niini ngadto ni Atty. Clarence Paul Oaminal, kanhi drug czar, ang background sa police official ilabi na ug nagsilbi usab kini isip regional director sa Police Regional Office 7, sa wala pa mabalhin sa National Capital Region Police Office (NCRPO).
Gani, pasi-aw pa sa senador nga na-ilhan lang niini si Sinas gumikan sa isyu sa birthday o mañanita party nga napuno sa pagsaway sa publiko gumikan sa giingong kalapasan sa health protocols subay sa COVID-19 pandemic.
Hinuon, gisiguro sa senate president nga iyahang pangutan-on si General Sinas sa mga bag-o niini nga lakang alang sa kalamboan sa Philippine National Police, ilabi na sa Highway Patrol Group (HPG).
Kahinumdoman nga napatay si Police Chief Master Sergeant Julius Arcalas, usa ka sakop sa HPG sa Cavite City, human nga misangpot sa pinusilay ang pagpanita niini sa usa ka SUV nga walay plaka, ingon man nga walay gipakita nga lisensya ang driver, ug uban pang dokumento.
Gihimug-atan ni Sotto nga wala’y problema sa mga pulis nga magbaton ug pagtahod sa mga motorista, apan gikinahanglan usab nga dili mabutang sa alanganin ang ilahang kinabuhi, butang nga angayan usab matud pa, nga tutokan ni General Sinas.
Sugyot sa magbabalaud ngadto sa heneral nga gikinahanglan nga siguraduhon ang kaluwasan sa kapulisan, ug dili angayan nga mutahud kung krimen na ang hisgotan.
