Giselyohan sa Spain ang ilang pagsulod sa FIFA World Cup Final human nila gipildi ang paboritong France, 2-0, sa semifinal didto sa Dallas Stadium.
Gipakita sa tropa ni coach Luis de la Fuente ang kontrolado ug disiplinadong dula, nga nagpugong sa Pransya sa paghimo og dagkong kahigayonan sa pag-iskor.
Ang mga goal nila ni Mikel Oyarzabal ug Pedro Porro maoy nagsiguro sa kadaugan sa Espanya.
Gibuksan ni Oyarzabal ang iskor pinaagi sa penalty kick sa unang bahin sa dula human napatid ni Lucas Digne si Lamine Yamal sulod sa penalty area.
Sa ikaduhang bahin, gipalapdan ni Porro ang labaw sa Espanya pinaagi sa maayong kombinasyon nila ni Dani Olmo.
Bisan og aduna pa’y kapin sa tunga sa oras aron makabawi, napakyas ang Pransya sa pagbungkag sa lig-on nga depensa sa Espanya, nga kausa pa lamang nakatugot og goal sa tibuok torneyo.
Sa maong kadaugan, nakasulod ang Espanya sa World Cup Final ug magpaabot sa modaog sa laing semifinal tali sa England ug Argentina didto sa New Jersey.
Samtang ang Pransya modula na lamang sa third-place play-off, nga magsilbi usab nga katapusang torneyo ni coach Didier Deschamps human sa 14 ka tuig sa pagpangulo sa nasudnong koponan.
