Nanawagan si Speaker Ferdinand Martin Romualdez sa 67 ka milyon nga mga botante nga Pilipino nga mahimong kritikal ug mabinantayon sa pagpili sa mga kandidato nga ilang botaran sa 2025 mid-term elections aron malikayan ang pag-instalar sa usa ka “Alice Guo”.
Gihimo ni Romualdez ang pamahayag taliwala sa padayong pagdawat sa Commission on Elections (Comelec) sa certificates of candidacy sa mga modagan sa umaabot nga piniliay.
Matod sa Speaker, ang kaso sa gitaktak nga mayor sa Bamban, Tarlac nga si Alice Guo, angay nga magsilbi nga pahinumdom sa mga botante nga mahimong kritiko ug mabinantayon aron dili na kini mahitabo pag-usab.
Miapelar usab ang opisyal ngadto sa Comelec nga ginangulohan ni Chairman George Garcia nga bisan og makonsiderar nga ‘ministerial in nature’ ang pagproseso sa certificates of candidacy (COCs), importante gihapon nga masiguro sa buhatan nga ang integridad sa proseso sa eleksyon.
