Daling gidala sa tambalanan si Office of the Vice President (OVP) Special Disbursing Officer Gina Acosta human naglain ang iyang pamati atol sa hearing sa House Committee on Good Government and Public Accountability gabii.
Sukad niadtong Lunes sa buntag, unang higayon nga nipatim-aw si Acosta human sa makadaghang higayon nga wala makatambong sa maong pagdungog diin gigisa kini pag-ayo.
Gipangutana siya sa mga magbabalaod kon unsay iyang papel sa pag-disburse sa confidential funds sa OVP ug dinhi iyang giangkon nga iyang gitugyan ang P125-Million ngadto kang Vice Presidential Security and Protection Group (VPSPG) Commander Col. Raymund Lachica ang security officer sa OVP.
Sa nasangpit nga pagdungog, gihangyo ni Bise Presidente Sara Duterte nga temporaryong suspensuhon ang pagdungog aron mahatagan og hangin si Acosta.
Pasado alas sais sa gabii dihang padayon nga gimonitor sa mga doktor ang iyang panglawas hangtod nga gipagawas siya sa lawak sakay sa wheelchair.
Ingon man nga giubanan usab ni Duterte si Acosta nga gidala sa Veterans Memorial Medical Center.
