Posibleng mahuman na ang giingong splash brothers sa NBA – ang kombinasyon nila ni Stephen Curry ug Klay Thompson sa Golden State Warriors.
Kini nunot sa nagsingabot nga pagpirma ni Klay Thompson sa iyang $50 milyones nga kontrata sa Dallas Mavericks.
Diin ang kombinasyon sa duha ka Warriors shooters gimarkahan sa daghang mga analista sa NBA nga labing deadliest backcourt sa kasaysayan sa liga, ingon man ang kamatuoran nga ang duha nakabulsa og upat ka championship rings.
Hinuon, dili sayon alang kang Thompson ang pagmintinar sa iyang maayong performance sa miaging duha ka season hinungdan nga nitumaw ang espekulasyon nga hulipan siya sa management sa Warriors.
Napildi sab ang Warriors sa Toronto Raptors, nunot sa sunodsunod nga pagkaangol sa ubang mga players sa Warriors, apil na si Kevin Durant.
Bisan og daw adunay laing negosasyon tali ni Klay Thompson ug sa Warriors management, si Thompson miuyon sab sa tanyag sa Western conference defending champion Dallas Mavericks nga $50 million sulod sa tulo ka tuig.
Tungod sa maong desisyon, hingpit nga mabungkag ang splash brothers sa NBA ug mabiyaan ang 4-time NBA champion ug ang gitawag nga greatest shooter of all time nga si Stephen Curry.
Sa habig sa Warriors, wala pa kini moluwat og opisyal nga pamahayag apan kahinumdoman nga hingpit usab nga gibuhian niini ang batikan nga si Chris Paul kinsa mipirma og deal sa San Antonio Spurs.
