CEBU CITY-Giduso sa lokal nga mga magbabalaod nga ilakip ang South Road Properties sa Real Property Tax Code sa dakbayan sa Sugbo human nasuta nga dili kini apil sa kasamtangang code ang maong lugar.
Nasayran nga si Cebu City Councilor Jocelyn Pesquera ug ang vice chair sa budget and finance committee, ang nisugyot og amendatory ordinance aron ilakip ang fair market values sa SRP ngadto sa kasamtangang RPT Code.
Gani kung maaprobahan, ang schedule sa base unit market values sa SRP mokabat gikan sa P45,000 ngadto sa P60,000, depende sa klasipikasyon sa yuta.
Ingon man nga ang proposed ordinance nagkanayon nga ang schedule sa fair market values maoy basehan sa pagkuwenta sa property taxes sulod sa dakbayan sa Sugbo.
Kusganong gituohan sa konsehal nga kon maaprobahan ang maong lakang, dako kini og dugang kita sa City Government.
Sa pikas bahin, nanghianot si Pesquera nga mopadayon ang katawhan sa Sugbo nga mosuporta sa mga lakang nga gibuhat sa lokal nga kagamhanan ug s amga umaabot usab alang sa pagpa-uswag ug pagpalambo sa syudad.
