Naghimo ang Social Security System (SSS) og bag-ong “Energy Sustainability Loan” program nga gilaumang ipagawas sa unang tunga sa sunod nga tuig aron tabangan ang ilang mga miyembro nga makabalhin sa paggamit og renewable energy.
Sumala kang SSS President Robert Joseph de Claro sa usa ka briefing, gipangandam na ang mga patakaran alang niining maong programa nga adunay gigahin nga P40 billion.
Pinaagi niini, makapangutang ang mga miyembro og P200,000 hangtod P400,000 nga pwede nilang bayaran sulod sa upat hangtod pito ka tuig.
Tumong sa SSS nga mahuman ang giya ug mga mekanismo sa maong pautang sa dili pa matapos ang kasamtangang tuig aron masiguro nga adunay ensaktong proteksyon ug masiguro nga ang mahulaman nga kwarta magamit gayud.
Gawas sa solar power, gitun-an usab karon sa pamunoan sa SSS ang posibilidad nga magamit ang maong loan isip down payment para sa pagpalit og electric vehicle (EV). Gibuhat kini sa SSS aron makahatag og abag nga haom sa panginahanglan sa ilang mga miyembro nga dili makabayad sa binulan nga bayranan.
