Gihatagan og gibug-aton ni National Maritime Council (NMC) Spokesperson Vice Admiral Alexander Lopez nga ang estratehikong presensya sa Pilipinas magpabilin sa Escoda Shoal bisan pa man sa pagbiya sa BRP Teresa Magbanua.
Matod ni Lopez, magpabilin ang Pilipinas sa presensiya niini sa Escoda pinaagi sa ubang paagi sama sa aerial patrol ug dili lang pinaagi sa mga naka-angkla nga barko niini.
Dugang niini nga ang importante kay ang Pilipinas maka-monitor sa maong lugar, maka-detect sa mga panghitabo, ug maka-dokumento niini.
Ingon man nga mahimo kini dili lamang pinaagi sa presensya sa BRP Magbanua kon dili pinaagi sa ubang mga kabtangan sa gobyerno.
Gisubli usab sa opisyal nga ang paglawig sa BRP Teresa Magbanua palayo sa Escoda wala’y labot sa nagpadayong dayalogo tali sa Pilipinas ug China.
Gipasabot ni Bise Admiral Alexander Lopez, pipila ka mga tripulante nanginahanglan og tabang nunot sa kahimtang nga ilang nahiagoman samtang nagkampo sa Escoda.
Matod pa niya nga kinahanglang ipailawom sa repair ang pinakadakong barko sa PCG.
Ang NMC niingon na nga ang barko nga mopuli sa BRP Teresa Magbanua milawig na sa Escoda Shoal. Hinuon, wala pa matino kon unsa nga barko ang magpabilin sa maong reef.
