CEBU – Gihulagway ni Department of Agriculture Secretary William Dar nga usa ka modelo ang Sugbuanong Busog, Luwas, ug Himsog (SUGBUsog) program sa probinsiya sa Sugbo.
Atol sa awarding sa mga mananaug sa ikaduhang hugna sa SUGBUsog kagahapong adlawa, gibutyag ni Sec. Dar nga angayan nga ipatuman lukop nasud ang maong programa, hayan plano niini nga maghimo ug bersyon nga mahimong ipakatap sa uban pang mga dakbayan ug kalungsoran tibuok nasud.
Matud pa sa opisyal nga ha-um ang maong programa sa Cebu Province sa programa sa DA nga “Plant, Plant, Plant” diin ang tinguha mao ang food security niining panahon sa pandemya.
Sigon pa nga ‘very innovative’ ang gihimo sa probinsiya sa pag-promote sa rural ug urban gardening. Nanghinaut si Dar nga magpadayon ang maong programa sa Kapitolyo ug mipasalig nga siento porsyento nga muhatag ug suporta ang DA niini.
Gani, dungan sa pag-award sa mga winner sa SUGBUsog, gitunol usab ni Sec. Dar ang P476 million nga certificate nga gitagana sa nagkadaiyang programa sa probinsiya sa Sugbo alang sa pagpalambo sa panguma.
