Gipaambit ni Chief of Staff sa Armed Forces of the Philippines Gen. Romeo Brawner Jr., nga nahibalik na ang tudlo sa usa ka Navy personnel nga naputlan tungod sa pagpanghasi sa China.
Kahinumduman niadtong Hunyo 17 sa Ayungin Shoal sa West Philippine Sea nahitabo ang pagpanghasi sa China Coast Guard diin mipaulbo sa kalagot sa kadaghanan tungod sa walay puangod nga paghulga niini sa mga Pilipino.
Diin pipila sa mga personahe sa CCG kay nagwara-wara og sundang, ingon man pagbuslot sa mga inflatable boat.
Matod ni Gen. Brawner, nga ang maong Navy personnel kay nakabalik na sa trabaho human nabalik ang iyang tudlo, duha lang ka bulan ang milabay.
Sa laing bahin, gipasabot sa hepe sa AFP nga nanawagan gihapon sila sa China nga bayran ang P60M nga kantidad sa mga nangaguba nga butang, ug ang kantidad sa mga gikawat nga pusil niini.
